雞

上個月政府殺雞﹐因為D內地雞黎到後先驗到有H7N9﹐咁由於D雞o係長沙灣活禽批發市場同d本地雞擺埋一齊﹐政府要殺埋d本地雞再停售活雞二十一日﹐每隻補三十蚊再加額外補貼。

咁岩岩開始本地雞賣得番﹐但內地雞就要再停多四個月﹐所以內地雞批發商就發難﹐用雞籠阻車入批發市場。 政府再停內地雞四個月係因為未搵到分流既地方﹐宜家唔想再比本地同內地雞擺埋一齊。

我就覺得政府個處理手法Ok﹐因為唔通又想殺多次雞咩? 而且有補償﹐每個批發商都逐隻賠再加停售一個月既幾萬元補償金。 

D內地雞販我就唔知佢地點諗﹐淨係識顧自己﹐依家對付既係禽流感呀﹐嚴密格離係好應該。D雞販就要求十日內恢復供港﹐真係無理取鬧﹐都未有地方分流﹐上水有地不過又要平整又要處理污水邊有咁快? 而且最離譜係用雞籠阻車入批發市場﹐我明你有訴求﹐但係可唔可以提出個合理D既要求同埋搵個岩既地方? 人地本地雞唔使做生意? 真係好似黃子華魚蛋論咁: 我唔要你比多一粒我﹐我要你O係佢度攞走一粒! 政府批住一個月津貼﹐黎緊會因應情況再批﹐點解要由受害者搞到變潑婦罵街咁肉酸呢?

要投訴就到政總﹐阻人搵食有乜謂? 己所不欲﹐勿施於人呀!

呢單野令我聯想到尖沙咀罵大陸人事件﹐又係不知所謂。 要鬧就去上水鬧水貨客啦﹐無啦啦走去鬧班遊客﹐仲阻住人做生意。我知有D內地遊客周街屙屎﹐咁你見到果種遊客咪當面鬧鑊金囉! 鬧班唔關事既﹐痴線! 要發泄去政總請願啦! 好似加拿大咁﹐你儲夠錢去到發覺人地唔歡迎你﹐鬧你蝗蟲不事生產你會覺得點呀? 我又冇周街屙屎﹐拎錢黎你度你都鬧? 己所不欲呀!

去請願﹐等政府學加拿大收緊入境先係正確做法! 我都唔鐘意香港愈黎愈迫﹐但隨街發泄\排泄係唔岩架嘛!

講番雞單野﹐今次出事係運左落黎先出事﹐好明顯係把關有問題! 未出結果就放行咁驗黎做乜? 搞到一鑊泡! 要避免類次事件其實最好就係文錦渡hold住D雞﹐等出結果先放行。不過政府話果邊冇位。除非唔食﹐否則真係要搵地分流。 內地雞販係要等下﹐鬼叫個政府見住D雞未驗好就入批發市場咁大個灟洞都唔一早處理咩! 依家做係遲D﹐不過都要做架﹐我諗冇人想案件重演。